സ്വർണത്തിന് ഇന്നും കൂടി; ഈ മാസത്തെ ഏറ്റവും ഉയർന്ന നിരക്ക്

​കൊച്ചി: കേരളത്തിൽ സ്വർണവിലയിൽ വൻ വർധന. ഗ്രാമിന് 210 രൂപയുടെ വർധനയാണ് ഇന്നുണ്ടായത്. പവന് 1,680 രൂപയും ഉയർന്നു. ഇതുപ്രകാരം ഗ്രാമിന്റെ വില 11,715 രൂപയായും പവന്റേത് 93,720 രൂപയായും ഉയർന്നു. ഈ മാസത്തെ റെക്കോഡ് നിരക്കിലേക്കും സ്വർണവില ഇന്നെത്തി. കഴിഞ്ഞ ദിവസം സ്വർണവിലയിൽ ഇടിവ് രേഖപ്പെടുത്തിയിരുന്നു.

18 കാരറ്റ് സ്വർണത്തിന് ഗ്രാമിന് 170 കൂടി. 77080 രൂപയാണ് 18 കാരറ്റ് സ്വർണത്തിന്റെ ഒരു പവന്റെ വില. 14 കാരറ്റ് സ്വർണത്തിനും വില വർധനയുണ്ടായിട്ടുണ്ട്. 135 രൂപയാണ് ഉയർന്നത്. 7505 രൂപയാണ് 14 കാരറ്റ് സ്വർണത്തിന്റെ വില. 14 കാരറ്റ് സ്വർണത്തിന്റെ വില 60040 രൂപയായാണ് ഉയർന്നത്.

കഴിഞ്ഞ ദിവസവും സ്വർണവില കുറഞ്ഞിരുന്നു. ബുധനാഴ്ച 240 രൂപ കുറഞ്ഞ് 92,040 രൂപയിലെത്തി. ഗ്രാമിന് 11,535 രൂപയിൽ നിന്ന് 30 രൂപ കുറഞ്ഞ് 11,505 രൂപയിലെത്തിയിരുന്നു. എന്നാൽ, ഇതിന് പിന്നാലെ സ്വർണത്തിന് റെക്കോഡ് വില രേഖപ്പെടുത്തുകയായിരുന്നു. ആഗോള വിപണിയിലും വലിയ കുതിപ്പാണ് സ്വർണവിലയിൽ ഉണ്ടായത്.

സ്വർണവിലയിൽ രണ്ട് ശതമാനത്തിന്റെ ഉയർച്ചയാണ് ആഗോള വിപണിയിൽ ഉണ്ടായത്. സ്​പോട്ട് ഗോൾഡ് വില രണ്ട് ശതമാനം ഉയർന്ന് 4,208.9 ഡോളറായി. ഒക്ടോബർ 21ന് ശേഷം അന്താരാഷ്ട്ര വിപണിയിൽ രേഖപ്പെടുത്തുന്ന ഏറ്റവും ഉയർന്ന വിലയാണിത്. യു.എസ് ഗോൾഡ് ഫ്യൂച്ചർ നിരക്കിലും വർധനയുണ്ടായിട്ടുണ്ട്. 2.4 ശതമാനം നേട്ടത്തോടെ 4.213.60 ഡോളറിലാണ് യു.എസ് ഗോൾഡ് ഫ്യൂച്ചർ നിരക്ക്. യു.എസ് ബോണ്ടുമാർക്കറ്റിലുണ്ടായ തിരിച്ചടി ഇന്ന് സ്വർണവിലയേയും സ്വാധീനിച്ചു.