ഡാർജിലിങ്ങിൽ കനത്ത മഴയ്ക്ക് പിന്നാലെ വൻ ഉരുൾപൊട്ടലുകൾ; 18 പേർ മരിച്ചു

 *കൊൽക്കത്ത* : പശ്ചിമ ബംഗാളിലെ ഡാർജിലിങ്ങ് ജില്ലയിൽ ശനിയാഴ്ച തുടങ്ങിയ കനത്ത മഴയ്ക്ക് പിന്നാലെ ഞായറാഴ്ച വൻ ഉരുൾപൊട്ടലുകൾ ഉണ്ടായി. ഈ ഉരുൾപൊട്ടലിൽ  18 പേർ മരണപ്പെട്ടതായി റിപ്പോർട്ട്. വീടുകളും, റോഡുകളും തകർന്നു, നിരവധി ഗ്രാമങ്ങൾ ഒറ്റപ്പെട്ടു. തകർന്ന വീടുകളിലെ തിരച്ചിൽ തുടരുന്നതിനാൽ മരണസംഖ്യ ഇനിയും ഉയരുമെന്ന് അധികൃതർ മുന്നറിയിപ്പ് നൽകി.

നോർത്ത് ബംഗാൾ വികസന മന്ത്രി ഉദയൻ ഗുഹ സ്ഥിതിഗതികളെ 'ഭയാനകം' എന്ന് പറഞ്ഞു. ഡാർജിലിങ്ങിലെ ജീവഹാനിയിൽ തനിക്ക് അതിയായ വേദനയുണ്ടെന്ന് പ്രധാനമന്ത്രി നരേന്ദ്ര മോദി പറഞ്ഞു. 'ദുരന്തബാധിതർക്ക് സാധ്യമായ എല്ലാ സഹായവും നൽകാൻ ഞങ്ങൾ പ്രതിജ്ഞാബദ്ധരാണ്' എന്ന് പ്രധാനമന്ത്രി എക്സിലൂടെ അറിയിച്ചു. വെസ്റ്റ് ബംഗാൾ മുഖ്യമന്ത്രി മമത ബാനർജി ദുരന്തബാധിത പ്രദേശങ്ങളിലെ സഹായ പ്രവർത്തനങ്ങൾ നേരിട്ട് നിരീക്ഷിക്കാൻ നോർത്ത് ബംഗാളിലേക്ക് സന്ദർശനം നടത്താൻ തീരുമാനിച്ചു.

 

ദുർഗ്ഗാ പൂജയ്ക്ക് ശേഷം കൊൽക്കത്തയിൽ നിന്നും ബംഗാളിന്റെ മറ്റ് ഭാഗങ്ങളിൽ നിന്നും ധാരാളം വിനോദസഞ്ചാരികൾ ഡാർജിലിങ്ങിലേക്ക് യാത്ര ചെയ്തിരുന്നു. മഴയും ഉരുൾപൊട്ടലുകളും കാരണം നിരവധി പേർ റോഡുകളിലും ഹോട്ടലുകളിലും കുടുങ്ങിക്കിടക്കുന്നു. അനിഷ്ട സംഭവങ്ങൾ ഒഴിവാക്കാൻ ഗൂർഖാലാൻഡ് ടെറിട്ടോറിയൽ അഡ്മിനിസ്ട്രേഷൻ (ജിടിഎ) പ്രധാന വിനോദസഞ്ചാര കേന്ദ്രങ്ങൾ അടച്ചിടാൻ തീരുമാനിച്ചു. ഡാർജിലിങ്ങിലെ ടോയ് ട്രെയിൻ സർവീസുകളും താത്കാലികമായി നിർത്തിവെച്ചു.

ഉരുൾപൊട്ടലുകൾ ഡാർജിലിങ്ങിന്റെ വിവിധ ഭാഗങ്ങളിൽ, പ്രത്യേകിച്ച് മിരിക്, കുരസിയോങ് തുടങ്ങിയ പ്രദേശങ്ങളിൽ ഉണ്ടായി. ദുഡിയ ഐറൺ ബ്രിഡ്ജ് പൊട്ടിപ്പോയതോടെ മിരിക്-സിലിഗുരി റൂട്ട് പൂർണമായി തടസപ്പെട്ടു. വീടുകൾ മുഴുവൻ മണ്ണിനടിയിലായി, റോഡുകൾ തകർന്നു, നദികളിൽ വെള്ളപ്പൊക്കം ഉണ്ടായി. നിരവധി ഗ്രാമങ്ങൾ ഒറ്റപ്പെട്ട നിലയിലാണ്, രക്ഷാദൗനത്യങ്ങൾക്ക് ബുദ്ധിമുട്ടുണ്ടാക്കിയിരിക്കുകയാണ്.

ഡാർജിലിങ്ങിലെ ദുരന്തത്തോടൊപ്പം ഭൂട്ടാനിലെ അണക്കെട്ടുകളിൽ നിന്ന് വെള്ളം ഒഴുകിവന്നതിനാൽ ബംഗാളിന്റെ വടക്കൻ ഭാഗങ്ങളിൽ വലിയ വെള്ളപ്പൊക്ക സാധ്യതയുണ്ടെന്ന് മുന്നറിയിപ്പ്. സംസ്ഥാന ദുരന്തനിവാരണ സേനയും (എൻഡിആർഎഫ്) നാഷണൽ ഡിസാസ്റ്റർ റെസ്പോൺസ് ഫോഴ്സും രക്ഷാപ്രവർത്തനങ്ങൾ ഊർജിതമാക്കി. പ്രതിപക്ഷ നേതാവ് രാഹുൽ ഗാന്ധിയും സംഭവത്തിൽ പ്രതികരിച്ചു, ദുരന്ത ബാധിതർക്ക്  സഹായങ്ങൾ വാഗ്ദാനം ചെയ്തു.

ഇന്ത്യൻ കാലാവസ്ഥാ വകുപ്പ് (ഐഎംഡി) ഡാർജിലിങ്ങിലും ചുറ്റുപാടുകളിലും കനത്ത മഴ തുടരുമെന്ന് മുന്നറിയിപ്പ് നൽകി. ദുരന്തബാധിതർക്ക് ഭക്ഷണവും മരുന്നും വിതരണം ചെയ്യുന്നതിനായി സർക്കാർ ക്യാമ്പുകൾ സ്ഥാപിച്ചു. സംഭവത്തിന്റെ പൂർണ വിലയിരുത്തൽ നടത്തി സഹായം ഉറപ്പാക്കുമെന്ന് മുഖ്യമന്ത്രി അറിയിച്ചു.